На памятным месцы зацвітуць дрэвы
Работнікі Шчадрынскага лясніцтва сумесна з членамі мясцовага школьнага лясніцтва навялі парадак на старых яўрэйскіх могілках і на магіле ахвярам фашызму.
Ля помніка, які ўсталяваны на магіле ахвярам фашызму, была пасаджана алея з маладых дрэў, а на дарослых раслінах абрэзана сухое галлё. Таксама на тэрыторыі ўдзельнікі суботніка скасілі траву і сабралі смецце.
Згадаем, што яўрэі заснавалі мястэчка Шчадрын у XIX стагоддзі. У 1917 годзе яны віталі савецкую ўладу, якая дала ім роўныя грамадзянскія правы. У 1919 годзе тут адкрылася чатырохкласная школа, дзе заняткі вяліся на ідыш. А ў канцы 20-х гадоў у мястэчку быў арганізаваны калгас.
Трагедыя здарылася ў гады нямецка-фашысцкай акупацыі. Спачатку захопнікі стварылі ў Шчадрыне яўрэйскае гета. А 8 сакавіка 1942 года фашысты вывелі шчадрынцаў да могілак. Тут ужо быў выкапаны роў, у які заганялі людзей, расстрэльвалі і засыпалі зямлёй. У той дзень загінула каля 1500 чалавек, у асноўным жанчыны, старыя і дзеці.
